昔、兄弟（ちょーでー）の爺さん二人がうやびたしが。長男の爺さんや金持ち、次男の爺さんや貧乏者（むぬ）やてぃ。　そして、しょっゅー、正月とか、あーいうときにや、兄（しーざ）ぬ爺さんがめーん行（ん）じぇ、物借（むぬか）てぃ来（ち）、銭（じぬー）ん借てぃち、あんし、暮しがたそーたしが。　なー、ある、また、次ぬ正月にや、旅人（たびんちゅー）ぬ巡（みぐ）てぃ来（ち）、「あー、今晩は。」んでぃ言ち、なー、旅ぬ者（むぬ）やしが、泊（とぅ）みてぃくぃりよー。」んでぃ、う願（ぬげ）ぇしちゃんとぅくる、くぬぅ爺さんや、「あー、私（わねー）なー家（やー）に食べ物（むぬん）無（ねー）らん、何（ぬー）ん無（ねー）らん。」でぃ言ち、断（くとぅ）わたしが、あー、旅ぬ人（ちゅ）や、「あー、是非とも一晩やくとぅ、何（ぬー）ん無（ねー）んてぃしむくとぅ。」んでぃ言ち、なーう願（ぬげ）ぇさくとぅ、「なー、あんしぇーなー、泊（とぅま）いみそーり。」りちぃ、なー泊（とぅま）たんくとぅくる、今度（くぅんどぅ）食べ物（むぬ）無（ねー）らん、何（ぬー）ん無（ねー）らんくとぅ、囲炉（じーろ）うてぃ、薪（たむん）とぅちきてぃ、火小（ふぃーぐゎー）燃（めー）ち、火正月（ひーしょーがち）しちゃんでぃぬくとぅ、うりぃが世（ゆ）ぬ中ぬ火正月（ひーしょーがち）ぬ起（う）くりぃあらんがやーんでぃいち、自分（どぅー）ん思（うむ）むとーんばーやいびん。考（かんげ）ぇとんばーやびしが。　あんさーに、うまうてぃ泊（とぅま）やーに、朝起（う）きてぃ立ち行（い）ちゅぬちふぁ、今度（くぅんどー）、うぬ旅ぬ人（ちゅ）や、ひき臼小（うーしぐゎー）持（む）っちょーてーん。「うりぃや、う土産（みやげ）とぅしぃうさぎぃくとぅ、うぬ臼（うーしぃ）や、銭小（じぬぐゎ）出（ん）じりぃんでぃ言ち、右んかい回（みぐ）らち、また、出（ん）じじゅさるや、また止まれぇんでぃ言ち、左（ひじゃ）いんかい回（みぐ）らしぃんね、うりぃや止（とぅ）まいぐとぅあいびん。」　うりぃ次男の爺さんや貰（いー）やーに、今度、御馳走ん作（ちく）てぃ、近所（きんじゅ）ぬ人（ちゅん）案内（あんねー）し、うぬ夜（ゆる）や、ゆぅえいしちぇん。　さくとぅ、今度（くんどー）、長男の爺さんや、うりぃ見（ん）じゃーに、「ひるましむんやさ。」んでぃ言ち、次男ぬくぬ爺さんが寝（にぃ）しじまたぬ頃（くる）、えー、うぬ臼小（うしぐゎー）や盗（にし）でぃ行（ん）じ、舟（ふに）かい乗（ぬ）してぃ、「なー、旅渡（わた）いすん。」でぃ言ち、なーうりぃかい逃ぎてぃ行ちゅぬ途中うてぃ、「あー、塩出（ん）じりぃ、出（ん）じぃ。」
んでぃ言ち、さくとぅ、なー、塩（うーす）ぬどぅーく出（ん）じじゅーさぬ、舟（ふに）までぃ沈（しじ）ざくとぅ、な、止（とぅ）みぬ技（わじゃ）ならん、止（とぅ）みんでぃぬくとぅわからんあくとぅ、止（とぅ）みぬくとぅんならん、な、舟共（ふにとぅむ）に沈（しじ）でぃんじ、な、海ぬ中うてぃ、なーだ、うぬ臼（うーし）ぬ、ちゃー回（みぐ）いし、なま、うぬ海ぬ塩（うす）ぬ出（ん）じとーぬふーじやいびぃん。　なー、世（ゆ）ぬ中ぬ兄貴（しでー）から一言（ひとぅくとぅ）、うっささーに、うぬ話や聞（ち）ちるそーびくとぅ、くりが本当（ふんとー）やあらんがやーでぃ言いぬ事（くとぅ）、なぁまちきてぃ、海ぬ塩（うーす）ぬあいしや、うぬ関係あらんがやでぃ思（うむ）とーいびん。おわり。