アカマターぬ化きてぃ来（ち）、女（いなぐ）。なぁ話ぇ似ちぇーうーしが、アカマターや、昔（んかし）ぇ、カマンタんでぃ言（い）ち、芋（うむ）煮（にー）る鍋（なーび）ぬ蓋や、茅（ガヤ）さーかん、から巻ちすたんよぉ。うり使（ちか）らんないねー、しぐ捨（し）てぃらんよーい。しぐ捨てぃねぇ、うりが下（しちゃ）なかいアカマターや育（すだ）ちーねー、化きーんでぃ。あんすくとぅ、うぬカマンタ鍋ぬ蓋や必（かんな）じ下ぎりんでぃ。ボロないるかん下ぎてぃんでぃる道理（どーれー）、うりわったーがまでぃん、分かいんよう。あんしすたしが。うりがうぬままそーちーね、うりが下んじぃ住（し）まいーね、必（かんな）じ、うりが下なかい住（し）まとーる物（むの）ぉ、必じ化きてぃ人（ちゅ）騙すんでぃ。あんするくとぅ、うりしゃせー、実（じち）ぇ、ちょうど今（なま）話さりーるぐとぅし、アカマターぬ出じてぃ、人騙ちぇしーしさくとぅ。あんさーい、ある人ぬ、うぬ女（いなぐ）ぬ、不思議（ふしぎ）やっさーんでぃ言ちゃくとぅ、アカマターやんでぃる事（くとぅ）分かてぃさくとぅ。今度（くんどー）なぁ、いっぺー苦労そーいにー、またある人ぬ、「いぇー、とぉまじなー、あんなれーから仕方（しかたー）ならんくとぅ、三月三日（さんぐゎちさんにち）に行じ、海んかい下りてぃ行じ、海ぬ物（むん）とぅてぃ食（くゎ）てぃ、砂（しな）踏（く）だみてぃ。帰（けー）てぃ来（ちゅ）どぅんしぇー、必じ立派なむんださ。」んでぃ言ち、習（ならー）さったくとぅ、「あんやみ。」んでぃ行じゃーに、取（とぅ）っちち、食（くゎ）だい、何（ぬー）さいし。砂踏だみてぃ来（ちょ）せーやぁ。あんさくとぅ、まぁ昔話やしが、ハンジリーぬみー、うぬアタマター産（な）ちぇーたんでぃ。うぬ話。あんさーい、うぬ後から大変（でーじ）やさやーんでぃ、うぬ鍋ぬ蓋や下ぎてぃるする。絶対（じぇったい）地（じー）なか捨（し）てぃてぇならんどーんでぃぬ話やうりやたん。