あれー、運玉義留（うんたまぎるー）とぅや、油喰坊主（あんだぼーじゃー）とぅ。あんしやがてぃ結婚（にーびち）すんどーんでぃねーやぁ、着物（ちの）ぉ十枚（じゅーめー）びけー戸棚（とぅだな）ん中んかい入（い）っとーてぃ、二人（たい）組（ぐー）なてぃ。運玉義留んどぅしぇー、戸棚から持（む）っち出（い）じゃさーてぇ。また油喰坊主どぅしぇー、外（ふか）んかい持っち出じゃさーやてーるふーじやんよ。あんさくり、うぬ持っち出じゃさー、「十枚着物（ちのー）やたん。」でぃ言ちょーしが、また持っち出じゃさーなか、「九（くくぬち）どぅやたる。」んでぃちやんてー。「でぃあんしぇ、正　（ただ）さぁ。」んでぃ言ちゃくとぅや、「盗（ぬす）でーぬ着物ぉちゃーし正さーりーが。」んでぃ言ちゃくとぅてぇ、「私（わー）が正すん。」でぃ言ち、ミングヮーミぐゎーなか、まー油（あんだ）担（かた）みてぃ、うったーとぅ、うまぬ門（じょー）うてぃ、ちちほーや、叩ち割てぃ、「アキサミヨー、なぁ私油たち割てぃねーんむんひゃー。」さくとぅ、くぬチーネーぬ、「いったー油ぐゎーうっさりやる、わったー着物十枚（じゅーめい）昨夜（ゆうべー）盗まっとんどーひゃー。」でぃ言ちゃくとぅ、うっさ正ちぇーたんでぃ。うぬ盗でぃ来（ち）ぇーぬ家（やー）ぬ前（めー）うてぃ、二人さーに。うぬ持っち出じゃちぇーせー、十（とぅ）やたんでぃいち言ちょーやぁ。またうぬ、戸棚なからる取（とぅ）てーしが十やんでぃ言ちょーや、持っち出じゃさーが九（くくぬち）どぅやたるんでぃ言ち。あんちさくとぅ、だぁ、あんしぇ、正さなんでぃ言ちゃくとぅてぇ、盗でーる人ぬちゃーし正さりーがんでぃ言ちょーるばーてぇ。あんさくとぅ、私（わー）が正さなんでぃ、油瓶（あんだがーみ）ぐゎーなかいまー油（あんだ）入ってぃ、うまぬ門うてぃ、うったーうぬまー油瓶たっち割ってぃさくとぅ、アキサミヨーさくとぅや、何（ぬー）が何（ぬー）やがんでぃさくとぅや。油瓶たち割てぃねーんむんなーんでぃ言ちゃくとぅ、いったー油瓶ぐゎーうっさたち割てぃ、わったー昨夜（ゆうび）着物十枚盗まっとんどーやぁんでぃ、うぬ話あたんよ。