南が星生りたるきどぅんやよ　五ち目や母離り者やり　七ち目にや母離り者やりよ　ならぶどぅぬ丈程ぬいくたら　しかま口居なさぬいぎゃとぅりよー居るけどぅ　夏雨ぬ　ぱいそりぬうてぃたらよ　どぅしき本一本ぬ下行き　焼きたくぬぐとぅ　手まがり居りよるよ　乾魚ぬぐとぅ　口すぶい思い居りょうる　着物てぃすや首やにやん　袖やにやん　着物やりよピラてぃすや　角やにやん　鼻やにやん　ピラやりよ　母てぃ居らばら袖ぬある首ぬある　着物着しゅみゆば父てぃん居らばら　鼻のある角ぬあるピラ使いみようば　ミノてぃすや　毛やにやん　ミノやりよ　笠てぃすやはうやにやん　笠やり　祖父てぃ居らばら毛ぬある角ぬある　ミノ笠よ着しゃみょーば鎌てぃすやまなやにやん　てぃくぬにやんまらやにやん鎌よりぶーり　叔父てぃん居らば　まらぬ有るてぃくぬ有る　鎌よ使いみようば　うりば思い　是ば思い居るうちばんどぅ　雨ん晴り太陽入りてぃどぅしき本一本ぬ下はらどぅ　とぅんじ　出じみりけーどぅ　南が星